Fréttir

Rangárþing eystra er nú Heilsueflandi samfélag

Í mörg ár hefur Heilsuefling verið hluti af stefnu stjórnvalda í Rangárþingi eystra og fjölmörg skref stigin í þá átt. Hvolsskóli og Leikskólinn Örk hófu innleiðingu Heilsueflandi skóla árið 2016 og stendur sú innleiðing enn yfir enda um langtímaverkefni að ræða. Rangárþing eystra hefur til margra ára stutt við íþróttastarfsemi og verið með samstarfssamninga við íþróttafélög í sveitarfélaginu sem hefur verið afar farsælt og skapað tækifæri fyrir börn að stunda fjölmargar íþóttagreinar. Mörg heilsueflandi verefni eru í sveitarfélaginu fyrir alla aldurshópa og má þar nefna 10 tinda verkefni Hvolsskóla, þar sem nemendur ganga á eitt fjall á ári alla grunnskólagögnuna, íþróttadaginn á Leikskólanum Örk þar sem allir taka þátt, nemendur og kennarar, hreyfingu fyrir aldurshópinn 60+ svo fátt eitt sé nefnt. Rangárþing eystra býður uppá mjög góða aðstöðu til alhliða þróttaiðkunar sem svo sem íþróttamiðstöð, líkamsræktarsal, sundlaug, heilsustíg, folfvöll o.fl.. Einnig er um þessar mundir unnið að nýju deiliskipulagi fyrir skóla og íþóttasvæði þar sem mjög metnaðarfullar hugmyndir til framtíðar eru hafðar að leiðarljósi. Nú í morgun var svo stigið það framfaraskref að formgera heilsueflandi aðgerðir með því að undirrita samning við Embætti landlæknis um Heilsueflandi samfélag. Heilsueflandi samfélag er samfélag þar sem tekið er mið af heilsu og vellíðan allra íbúa í stefnumótun og aðgerðum á öllum sviðum. Þar er unnið markvisst lýðheilsustarf með lýðheilsuvísa, gátlista HSAM og viðeigandi gögn til að meta stöðuna með tilliti til íbúa á öllum æviskeiðum og forgangsraða í samræmi við þá greiningu. Unnið er heildstætt með áhrifaþætti heilbrigðis og er meginmarkmið starfsins að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa í Rangárþingi eystra. Með innleiðingu Heilsueflandi samfélags vinna samfélög að heimsmarkmiðum Sameinuðu þjóðanna. Á meðfylgjandi myndum má sjá Lilju Einarsdóttur, sveitarstjóra og Ölmu Möller, landlækni undirrita samninginn. Á bak við þær stendur flottur hópur krakka úr leikskólanum Örk sem söng 2 lög við athöfnina.

Ungmennin fögnuðu góðri vinnu í Tungu- og Tumastaðaskógi

Í lok síðust viku komu saman öll ungmenni sem hafa unnið við fegrun og endurbætur í Tungu- og Tumastaðaskógi í Fljótshlíð í sumar og grilluðu. Tilefnið var að verkefnin í skógunum var að ljúka, en þau hafa staðið sig einstaklega vel og hafa grisjað og hreinsað brotnar greinar og séð um að kurla það líka. Þau lögðu hátt í 2 km af kurli í göngu og hjólastíga. Búið er að slá flatir og setja þar bekki og borð. Eldstæði var hlaðið þar sem hægt er að grilla, vatnslögn var lögð að salernishúsi og komið var upp vatnskrana fyrir neysluvatn. Bekkir, gerðir úr timbri úr skóginum, eru á megingönguleiðinni þar sem gott er að sitja og hlusta á lífið í skóginum og finna ilminn af trjánum. Aðgengi að svæðinu hefur verið bætt með stækkun bílastæða. Ungmennin prófuðu hjólaleiðirnar sem eru stikaðar og merktar og allir ánægðir með afraksturinn. Samstarf hefur verið við Skógræktina við þessa vinnu og er nú unnið að nýju yfirlitskorti fyrir svæðið allt.

Ný 25 metra löng göngubrú yfir Krossá í Þórsmörk

Ferðafélag Íslands hefur tekið í notkun nýja göngubrú yfir Krossá. Göngubrúin er 25 metra löng og á hjólum. Stefán Jökull Jakobsson, umsjónarmaður skála, segir að brúin sé kranabóma og smíðuð á vörubílahásingar svo hægt sé að færa hana eftir þörfum þar sem Krossá er breytileg. Hann bendir fólki á að nú gæti gestir sem ekki treystu sér á bílum yfir Krossá lagt bílunum við Álfakirkju og farið fótgangandi yfir í Langadal.

Fjölskyldumiði á Skógasafn í allt sumar

Skógasafnið á Skógum tekur vel á móti fjölskyldum í allt sumar og býður upp á tilboð fyrir alla fjölskylduna. Á Skógum er líka að finna Húsasafn og Samgöngusafn, skemmtun og fræðsla fyrir alla og ratleikur fyrir fróðleiksfús börn á öllum aldri.

Björn og Rut á Kvoslæk hljóta afreksbikar Fljótshlíðinga árið 2020

Björn Bjarnasson og Rut Ingólfsdóttir á Kvoslæk í Fljótshlíð voru verðlaunuð á 17. júní hátíðarhöldunum í Goðalandi fyrir framlag þeirra til menningarmála. Þau tóku við afreksbikar Búnaðafélags Fljótshlíðar fyrir árið 2020. Þau hafa staðið fyrir fjölda menningarviðburða á Kvoslæk síðast liðin ár og auðgað líf íbúa og gesta með fróðlegum erindum og listviðburðum. Næsti viðburður í Hlöðunni á Kvoslæk verður 21. júní, en þá flytja systurnar Signý og Þóra Fríða Sæmundsdætur íslensk og erlend lög m.a. eftir Ingibjörgu Sigurðardóttur frá Bjálmholti í Rangárvallasýslu.

Fljótshlíðarbændur græða upp Fljótshlíðarafrétt

Í byrjun júní fóru Fljótshlíðarbændur í árlega vorferð inn á Fljótshlíðarafrétt. Þetta hafa þeir gert frá árinu 1971 og grætt upp stórt landsvæði, en þar er unnið samkvæmt landbótaáætlun. Upprekstarfélagið í Fljótshlíð hlaut Landgræðsluverðlaunin árið 2015 fyrir áratuga uppgræðslustarf og uppgræðslu á um 400 ha svæði. Í dag er verið að vinna með aðra 400 ha og er þátttaka bænda ávallt góð. Svæðið er einnig vinsælt útivistasvæði bæði sumar og vetur. Þaðan er stutt inn á Suðurhálendið. Rangárþing eystra hefur stutt við verkefnið til fjölda ára . Á myndunum má sjá bændur sem fóru í ferðina í byjun júní. Myndir Kristinn Jónsson.

Visit Hvolsvöllur er ný heimasíða fyrir ferðaþjónustu í Rangárþingi eystra

Sveitarstjórn Rangárþings eystra samþykkti í vor að bregðast við því ástandi sem Covid -19 hefur á ferðaþjónstugreinina í sveitarfélaginu með því að hrinda í framkvæmd ferðamálstefnu sveitarfélagsins af miklum krafti. Sérstök áhersla er lögð á tvo þætti stefnunar þ.e. aðgengi, fegrun og fjölgun áfangastaða og markaðs- og kynningarvinna fyrir greinina. Í sveitarfélaginu eru gríðarlega margir og fjölbreyttir áfangastaðir allt frá svartri fjöru í Landeyjum að jöklum, fossum, hellum og Suðurhálendinu. Auk þess er einnn merkasti menningararfur landsins er að finna á Byggðasafninu á Skógum, en þar er auk byggðasafnsins, húsa- og samgöngusafn. Rangárþing eystra er gullnáma fyrir náttúru unnendur og viljum við með nýrri heimasíðu (visithvolsvollur.is) draga fram það helsta sem sveitarfélagið hefur upp á að bjóða. Í sveitarfélaginu er mikill fjöldi af ferðaþjónustufyrirtækjum sem bjóða nú upp á skemmtileg tilboð í afþreyingu, gistingu og mat, auk þess sem sum þeirra hafa sérsniðið tilboð og þjónustu fyrir Íslendinga. Á síðunni er mikið magn af upplýsingum þannig að allir ættu að finna eitthvað við sitt hæfi. Visithvolsvollur.is, nýja heimasíða fyrir ferðaþjónustu í Rangárþingi eystra, var opnuð formlega á fundi sveitarstjórnar í gær þann 15. júní 2020.

Starfsfólk Kirkjuhvols á toppi Eyjafjallajökuls

Árleg vorferð starfsfólks á Hjúkrunar- og dvalarheimilinu Kirkjuhvoli á Hvolsvelli var farin s.l. miðvikudag í sól og blíðu. Farið var með South Coast Adventure ferðaskipuleggjendum á Hvolsvelli og var farartækið þrír ofurjeppar. Lagt var af stað frá Hvolsvelli og lá leiðin beint upp á Eyjafjallajökul þar sem allir nutu útsýnisins sem er einstakt í svona góðu veðri. Ferðanefndin bauð upp á gott nesti á toppi jökulsins, við Goðastein, sem er nauðsynlegt í svona ferð. Af toppi Eyjafjallajökuls var keyrt inn í Þórsmörk, þar var grillað, gengið um og spilað eins og lög gera ráð fyrir á þessum merka og fallega stað. Keyrt var til baka um kvöldið og allt starfsfólk endurnært og ánægt með ferðina.

Í Rangárþingi eystra eru sex félagsheimili

Sveitarfélagið Rangárþing eystra varð til þann 9. júní árið 2002. Þá sameinuðust sex hreppar í austanverðri Rangárvallarsýslu í eitt sveitarfélag; Hvolhreppur, Fljótshlíðarhreppur, Austur-Landeyjahreppur, Vestur-Landeyjahreppur, Austur-Eyjafjallahreppur og Vestur-Eyjafjallahreppur. Hvert þessarar sveitarfélaga átti sitt félagsheimili sem rann inn í hið nýja sveitarfélag, Rangárþing eystra. Gera má ráð fyrir því að það sé met á landsvísu en flest sveitarfélög eiga eitt félagsheimili þó að til séu sveitarfélög sem eiga ekkert og önnur sem eiga fleiri en eitt. Sum félagsheimila í Rangárþingi eystra hafa fengið meira hlutverk en að sinna samfélagslegum verkefnum og eru þá hlutverkin oftast tengd ferðaþjónustu á einhvern hátt. Rangárþing eystra leigir út félagsheimlin fyrir stærri viðburði eins og fyrir stórar fundi, ráðstefnur, ættarmót, jarðafarir veislur eins og fermingar og afmæli. En einnig fara þar fram samfélagslegir viðburðir eins og 17. júní hátíðarhöld og þorrablót. Oft er talað um að félagsheimilin sem hjartað í hverju samfélagi og við erum rík að eiga sex slík heimili. Skrifstofa Rangárþings eystra gefur upplýsingar um félagsheimilin og einnig má finna upplýsingar um þau á heimasíðu sveitarfélagsins.

Heimsókn í alvöru sveit undir Eyjafjöllum

Í Rangárþingi eystra er hægt að heimsækja sveitarbæi og upplifa alvöru sveit. Það eru bæirnir Stóra Mörk og Ásólfsskáli undir Eyjafjöllum sem bjóða gestum heim. Á báðum bæjunum er fjölbreyttur búskapur og taka ábúendur vel á móti gestum. Einnig er þar rekin ferðaþjónusta þannig að hægt er að dvelja í nálægð við býlin og dýrin og njóta um leið alls þess sem þau hafa upp á að bjóða. Hægt er að finna frekari upplýsingar á heimasíðun bondi.is